ТА САЙН АЖИЛТАН УУ?

Байгууллага чинь таалагдахгүй бол ажлаасаа гар, ажлын байраа өөрчил, карьераа ахиул гэсэн мэдээлэл, зөвлөгөө хаа сайгүй байх боллоо. Харин би эсрэг зөвлөгөө өгмөөр байна. Ажлын байрны өөрчлөлт бүр сайн үр дагаварыг танд авч ирэхгүй. 2 жилийн дотор 7 ажлын байр сольсон ажил горилогч нартай тарч л байлаа. Тэд өмнөх ажлаа солих болсон шалтгаанаа ажил олгогч, ажлын байрны нөхцөл таалагдаагүй гэж тайлбарлах нь нийтлэг. Үүнийг ч бас үгүйсгэхэд хэцүү л дээ. Гэсэн ч “Ажилтан”, “Ажил олгогч” хоёрын харилцаа, хамтын ажиллагааны амжилт зөвхөн нэг талын үүрэг дээр тогтдоггүй. “Ажилтан”, “Ажил олгогч” аль аль нь “Сайн” байхын тулд хичээх ёстой.

Тиймээс хэрэв та “АЖИЛТАН” бол өөрөөсөө “БИ САЙН АЖИЛТАН” мөн үү? сайн ажилтан байхын тулд би ажлаа, байгууллагаа сайжруулхын тулд юу хийлээ? гээд асуугаад үзээрэй! Сайн ажилтнууд ихэнхдээ дараах хандлагатай байдаг:

• Ажлыг том, жижиг гэлтгүй чанартай хийхийг эрмэлздэг;
• Чанартай гүйцэтгэл гаргахын тулд судалдаг, уншдаг, асуудаг, хэлэлцдэг, оролцдог;
• Асуудлаас бултдаггүй, асуудлыг шүүмжилдэггүй, харин асуудлыг илрүүлж засдаг, залруулдаг;
• Ажлыг илүү хурдан, илүү үр дүнтэй хийж болох аргыг олохыг хичээдэг гм.
  Үндсэндээ “САЙН АЖИЛТАН”-ууд “СИСТЕМ”-г шүүмжлэх, зугтахын оронд түүнийг өөрчлөхийг хичээдэг. Харин “САЙН АЖИЛ ОЛГОГЧ” нар “Сайн ажилтан”-аа алдахыг хүсдэггүй учраас өөрчлөлтийг зөвшөөрдөг ба үр дүнд нь аль аль нь хождог.

Хэрэв та өөрийгөө үнэхээр “САЙН АЖИЛТАН” гэж бодож байгаа бол сул менежменттэй компанид орж, өөрийгөө сорихыг зөвлье (№1-ээс №2 талбарт шилж)!

Харин эсрэгээрээ та өөрийгөө “МУУ АЖИЛТАН” гэж бодож байгаа бол сайн менежменттэй компанид орж, соёл, системийг нь суралцаарай (№4-с №3 талбарт шилж)!

Танд амжилт хүсье!